Overblog
Editer l'article Suivre ce blog Administration + Créer mon blog
20 septembre 2009 7 20 /09 /septembre /2009 22:15

Kréyolad 284

 

Ou pa ka sav


 

Boudoum : épi an « Asipipi » labann a Pipo, Joslin, Joj, Jakob épi Janklod mété tout moun dakò.

Kisiswa lé swasanntrèzis, ki di :

-         Ni trantan nou ka pran médikaman-tala é sa toujou ba nou bon soulajman !

 

Kantapou lé swasannkatòzis, yo di :

-         Fo fini épi zafè istad pabò Dilon, atjelman nou dakò pou Latriom menm si sé pou pliziè konsè ! Pas fo jan isi fo nou pran responsabilité-nou. Si nou enmen Kassav fo nou péyé tiké-nou. Sé nou menm ki pou mennen bak-nou !

 

Poudayè, savrè si sé pa pou sa, lé zorganizatè mété twa dat anplis pou té rivé kontanté tout moun.

Kom toujou ni moun ka palé pou ayen, ni an boug ki di mwen :

-         Poutji yo pa mété 30 dat padavwè yo ni trantan ? Konsa nou té ké wè pou toulbon sa ki fanatik Kassav.

Man réfléchi, mé man pa réponn man té boudé kon an doubsis lè man tann Pipo chanté : « pa fè parizien, man ké dématé jé a anlè’w…. »

Toupandan Joslin té ka mandé « Solèy » pas « Kay manman la tè té ka tranblé» pabò Latriom.

Joj gadé an tifanm anfom, ki té ni an gro kapital a libéré, épi i di :

-         Man malad a’w !

Janklod ki té ja ka gadé’y dépi avan’y pas i té anvi « Kolé séré » épi’y di’y vitman :

Avèw’ doudou……

Man jis kwè Joj vini titak tenbré, pa i pa té ka rété kriyé an mwé : « Eva, Eva, Eva…. » I ni ki lè Joslin di’y :

   - « Mi tjè-mwen » ! sa kom fè’y viré tibren larel. Mé i pa ni tan fini, pas Jakob di Joj :            

   -  Si ou malad, pa bizwen ay lopital « Zouk la sé sel médikaman » ki ni, an plis di sa sé « Mizik a Bondié »!

 

Lè Joj tann sa, dot moun kon’y té malad tou. An final di kont, apré an bel « Oh Madiana » sa « Soulajé yo » pas yo té ja bien « Siyé bwa » ek yo mandé moun alé Latriom pandan 8 jou.

 

Mi sé la, jenn kon vié, avokté kon koklez té ka di ba jénérasion-yo « An nou alé » ou pa ka sav la pié ka mennen tet.  Kom sé an sel Kassav ki ni, ou pé jwenn épi an « Bel kréati »  mé osi an « Soukougnan » alow :

-         « An nou alé wè Kassav ! »

 

Ni an boug ki mandé-mwen, Jid :

« Ou lé » ?

Kom man té adan an « Mové jou » man pa réponn li.


Partager cet article
Repost0

commentaires

Présentation

  • : Le blog de jude duranty
  • : Publication régulière de textes créoles contemporains Kréyol tou lé jou
  • Contact

Recherche

Liens