Overblog
Editer l'article Suivre ce blog Administration + Créer mon blog
4 avril 2010 7 04 /04 /avril /2010 19:27

Dé mal krab

 

Adan zafè tout lo éleksion-tala, sa fè anlo bri an tet moun mé osi an tet krab. Epi gro mizik wopawlè épi kisasayésa, ni krab ki jik vini soud.

Sa nou pé di sé ki sé tan-tala sa pa djè bel pou-yo. Apré ratiè, bégon, bri ek brigandaj ni yonndé krab ki ped tet-yo. Yo di sé fot bon tjè’y ki fè i pa ni tet, mé kanmenm kanmenm !

 

Apré konba kok réjional la, sa nou konstaté an périod-tala, sé ki dé mal krab pa ka rété adan an menm tou. Ni an vié krab jòn ki ja ni an laj ki désidé ladjé mòdan’y ek chapé lapo’y anlot koté.

Pandan tan an, ni an jenn mal krab ki sòti pa koté an mang Foyal pou chapé monté Plato Roy.

 

Apré sé dèyè konba ki ni konba. Ni yonn ki pété pa koté Lanmanten.

Alfred épi Piè ni an ti-kochon ka nouri. Yo pa konté atann jik an désanm, kom pak pa lwen, yo désidé wè mwa prochen pou wè ki manniè krab-la ka dékalé.

RBP (Radio Bwa Patat) di sé pétet an pwason davril.

 

Adan zafè goumen-tala, tout simenn an, taksi ka mawon pas kolbògò ka kontrolé-yo aléliron.

 

Serjo kité plas mè Foyal pas atjelman i prézidan. Adan dènié konsèy minisipal jédi a, i mandé yo kriyé’y a partir di atjelman : Se Le. I palé pies kalté moun fè pies lafet épi’y. I kité plas ba Rémon. Sé li ki ni laklé Foyal. Es atjelman moun ké vini kon yo lé pou fè vakabonajri ?

Es moun éti té ka péyé gro konsa lenpo ké déviré désann ?

 

Epi nouvo prézidan an, tout  krab déwò sé jou-tala. Yo ka chaché trapé an pat krab pas Se Le té ponmet 5000 anplwa, kidonk bon pat krab pou moun pé sisé.

Apenn i enstalé, i ja ni an lis chomè ki ja ka di :

-         Nou pa li lentansion, yo fè-nou pran dlo mousach pou let !

 

An périod-tala lè ou sé an krab, fout ou ka pran fè !

Partager cet article
Repost0

commentaires