Overblog
Editer l'article Suivre ce blog Administration + Créer mon blog
2 juillet 2010 5 02 /07 /juillet /2010 21:02


Lanmizè blé(zil)

 

Vandrèdi pasé tout Brézilien Matinik té tou tris. Yo tout té ka bésé tet-yo akondi an chen ki pran an kout zoranj-si.

Anlo ki ni sistem vié-neg di sé palakoz yo té ka jwa an blé ki fè yo ped dé bi a yonn. Kom sé koulè Lafrans, asiparé tousa ki mété koulè-tala ka ped lanné-tala.

Brézil toujou té an jòn épi vèw, mé koulè-tala potjiré-yo djiyon ek nana.

Ni an gro lanm jònabriko ki anni néyé-yo akondi an lavalas dlo lariviè.

Sa fè brézilien Brézil bon lapenn mé « brézilien » matinik trapé an falfret pli red ki an groprel. Ni yonndé ki té vann triko blé Lafrans-la, pou té vini « brézilien ». Mano jik di i ka konprann langaj sé mésié, é i té ké jik konpè épi Antrénè a (menmsi sé Doménèk selman i té konnet). Misié té ké di’y i té ké montré moun kouman mon ka jwé boul pas daprè’y sé fransé a pa té sa menm chouté an boul pas yo té ni dé pié niklé.

 

Man konnet an gran-madanm, ki té ja di-mwen :

-         Jennjan, ou sav Brézil ké ped!

Man pa té di’y ayen mé an fon tjè-mwen man bougonnen kon Nikola :

-         Lamè pa konnet ayen an foutbol, asiré Brézil ké genyen tousa ki vini !

Apré match-la, man alé wè’y, mi sa i fè mwen pou larépons :

-         Man gadé an télé mwen-an, man wè sé mésié fè trop sik. An nou di sa, zafè tjenbwa-yo a ki ni an lot non. Man kwè sé makoumba, ni non sa. An plis di sa, yo mété dé limiè jòn épi vèw asou gro kris-la ki anlè lavil Rio. Tousa sé bagay malédision, Jézi pa té ka jwé foutbol. Asiré sa pa té pou pòté-yo chans.

Es lamè ni rézon ?

Sa man sav sé ki : « sa ou pa sav gran paséw ! »

 

Antouléka, lakoup dimond-tala ka ba moun bon falfret, i ka jwé welto épi sipòtè. Akondi sé moun gwadloup-la sipriz dèyè poko mannié.

 

Lé vakansié pé pa menm alé Ofranswa « La bénwa Jozéfin » Lewa Monjen an prosé épi Léta. Mé nou ka konstaté ki la ni an bétjé anlè lilet-la é yo poko di’y ayen.

Moun ki té la, vréyé bon labou an tribinal la, jikatan yo té oblijé mété yo déwò.

Bon lanmizè blé anlè moun ki té achté télé doublevé doublevé pou té sa wè Brézil chanpion. Lanmizè blé(zil) anlè yo.

 


 

Jid

Partager cet article
Repost0

commentaires