Overblog
Editer l'article Suivre ce blog Administration + Créer mon blog
23 décembre 2010 4 23 /12 /décembre /2010 15:45

Ziédou Lalin

 


Mardi bonmaten pa koté twazè’d maten Lalin fè an ti-ziédou ba nou.

I té lé kozé épi tousa ki ni labitid lévé bonnè. Tousa ki pa lé solèy wè lonbrik-yo.

Ki sa i té lé di nou ?

Sé li sel ki sav ! Ni an ti-pawol ka di « sa ou pa sav, gran pasé’w ».

Antouléka sa nou pé asiré, sé ki Lalin pa ka ped la lin, i pa kon sé moun-an ka fè réjim pou yo gadé la lin, pou yo pa ped lakat marin (dapré yo).

Lalin pa wont grosè’y, pas i sav lè i plenn asiré i ké akouché. I sav ni an tan pou chak doukou. Lalin ki ka gadé latè toulong alé, palé ba nou.

Es nou ké sa kouté ?

Es nou ké sa konprann langaj-li ?

Sé pa lé Lalin pa lé, mé i ja las palé ba nou, é ou sé di nou pa lé kouté ankò, pas nou pa ni tan pou sa.

Ti-ziédou kozé-tala sé pétet pou té di nou : pengad ! pas pi ta pé pi tris.

Ti-ziédou-tala sé pétet pou di nou : ritrouvé larel konfians-nou ki ka filoché oben ki lé dégrapé.

Ti-ziédou-tala sé pou té di nou, i ja sav ki manniè 2011 ké koumansé.

Es i ké asou menm kanman-an ?

Kidonk, sa ki ni pat wou, ké anvi kontinié vréyé mépri asou ti-travayè ka chaché an jounen travay, éti pizanpi ka vini ra kon zé bourik.

Epi travayè aprézan, ké toujou anvié gro pat won, pas i ni patron épi pat won. Sé kondisiré an soumaren ek an maren sou, sé pa menm brisi. Pa ni bon patron san bon nouvriyé, mé asiré ni patron pofitè épi bon  nouvriyé. Anni gadé sa ka pasé dépi 28 jou, patron ek ouvriyé adan an zafè brikolaj olié yo négosié.

Pétet Lalin anvi di nou, an nou gadé épi anlot zié, pou lavi-nou pa ped sa ki ta nou pou bon, ek nou sa rivé rété sa nou yé.

Mé es nou sav sa nou yé ?

Partager cet article
Repost0

commentaires

Présentation

  • : Le blog de jude duranty
  • : Publication régulière de textes créoles contemporains Kréyol tou lé jou
  • Contact

Recherche

Liens