Overblog
Editer l'article Suivre ce blog Administration + Créer mon blog
30 mai 2012 3 30 /05 /mai /2012 15:27

Sòti an sann….

 

 

Adjilbè di sé jou-tala, i pa djè ni chans. An plen mwa mé gro lapli ka dékalé jaden’y. Misié ki ni labitid fè kann pèd rékot li, pas pa ni asé soley. Misié pa djè enmen zafè périod politik la pies toubannman.

Ni dé simenn i konprann i té ké trapé an ti-wouspel épi lafen éleksion Prézidan-an. Mé ou sé di sé sòti an sann pou tonbé an difé.

Si éleksion Prézidan Lafrans dit, atjelman lamenm dèyè’y i ni an éleksion dépité. Eleksion ka kontinié pli red a Sayigon. Atjelman ou ka wè plis nonm ek fanm politik ka fè siwawa. Yo tout ka fè sanblaj, miting, gran penteng, anfen yo ka sanblé anlo moun alantou-yo pou montré pogram-yo.

Ni adan ka jik bliyé dépité épi mè sé pa menm bagay la. Yo ka ponmet sa an mè pé fè mé pa an dépité. Yo chak ni an rézon pou yo vini. Ni yonn ki di sé pa li sé la popilasion ki mandé’y vini. I té ka’y li trantjil é yo vini chaché’y. Pies pa ka di sé pou poch-li.

Yo tout ka di sé pou lajénes, pou granmoun ek kont chomaj. Ni anlo jénes ki pa ka menm kapté-yo. Yo pa menm sav si i ni éleksion.

Anlo kandida sav ki yo bizwen an plas pas épi sel Lasanblé-a sé plas la ké chè. Sa ki ja mè, éti ki pa djè asiré pasé, ka asiré plas-yo.

Yo pies pa ka di fok nou mété tet-nou an menm bonnet-la pou travay ba tout péyi-a é pa an konpanyi adan-yo. Yo tout sav travay ka vini ra kon zé-bourik mé yo ka fè konsi ké ni anlo travay ba tout moun.

 

Lafen simenm pasé sé té o pli bel miting pou prézanté kandida adwet kon agoch. Sanmdi swè ni yonn ki di :

-         Nou ké manjé yo épi lapo yo !

Misié mèyè konprann an kandida sé an bannann. Mé es sé pa an fig i ka ba nou ?

 

Partager cet article
Repost0

commentaires