Sé sa manman té di
Yo di mango vet pa ka tonbé avan mango mi
Mi an bagay ki red, tjè’w ka démi
lè ou wè an mango matrité chapé tonbé, blip.
Ou té ka fè fos anlè’y, mé bouch ou pé rété wouvè, vid.
Yo di mango vet pa ka tonbé avan mango mi
Délè ou ka palé ba ich ou
I ka jik di, ou ka fè kon an vié liv déchiré
Pas ou sav sa « sa ou pa sav lontan gran pasé’w »
Wou ki ja wè lavi padan pliziè jou ouvè zié’y
Wou ki ja tann lavi sanslé anba mizé
Wou ki wè la vites makakri
Ka fè makak ek ka ri
Mé I ka kouté kanmarad
Ka mété’y an vié kalvakad.
Lè ou ni pou mété an rad dèy
Asiré sa sé an vié rad.
E la pa ni parad.
Yo di mango vet pa ka tonbé avan mango mi
Atjelman an vié manniè gadé
(Pas ou ka réfléchi trop)
Pé fè’w trapé, pa an kout zié, mé an krévé
Yo pé pitjé’w kon an ba laglas.
Yo di mango vet pa ka tonbé avan mango mi
Manmay pou an pawol
Ich ou pé kité lékol
Dé pié douvan
I pé kité lavi
I pé kité lafanmi
Dan soufrans épi lézanmi.
Kon man tann Manman Téddy
E kon défen manman té di :
« pengad, pas lavi an moun pa lavi an chien »
Sé sa manman té di mwen ni lontan
« mango vet pé tonbé avan mango mi »
Sirtou lè lajénes vréyé woch dèyè’y
Ek i pa atann li matrité, ek bien mi.
Lè i tonbé konsa grenn li pa menm oblijé lévé.
Sé sa manman té di
E man ka chonjé manman Teddy.
/fdata%2F2626935%2Favatar-blog-1082880251-tmpphpCadlR0.gif){kind=avatar}