Votman pa ka izé !
Sanmdi pasé, kou-tala élektè té ni ki dé kandida, mé ou sé di yo té ankò pli mélé pou chwézi.
An pati di yo ni pou chwézi ant lakanp épi angoudi !
Dot di konsa :
- Sé sòti an sann pou tonbé an difé !
An madanm ki pa ni labitid séré ayen, sé pa pawol i ka séré, di karektèman :
- Bo tjou bouwo ou pandi, pa di bouwo bonjou ou pandi, alow…. »
Sé zot ki di’y sé pa mwen pou pa lapenn di man malélivé.
Mé es nou pé pa chwézi kanmenm ?
Ni sa ki chwézi lavé lanmen yo. Yo anni voté blan.
Mé es lè ou neg oben pa blan ou pé voté blan ?
Adjilbè di mwen :
- Man mélé, man anbarasé, mé asiré man pé ké voté ba an moun ki rayi kréyol !
Ni kandida ki dapré lakat marin di fok pa aprann kréyol lékol pa koté Laréinion. Lè misié li sa ek wè manniè sé moun an palé di kréyol an télé-a, i chwézi lamenm.
Asiré i pé ké voté ba sa ki pa ka respekté kilti’y.
Kidonk si nou pa chwézi bli bon-an, omwen nou pé chwézi mwen mové-a.
Kidonk sanmdi zot pa ni rézon rété bò kay zot.
Ay voté pou zot pa di dèmen sé pa mwen ki mété’y la.
Poveb-la di « ni dé bagay éti pa ka izé sé platpié ek nen kochon, mé man ka mété grenn sel mwen pou di :
- Votman pa ka izé !
Jid
/fdata%2F2626935%2Favatar-blog-1082880251-tmpphpCadlR0.gif){kind=avatar}